香港股市傳奇殞落?!
23/09/2020
幾日前(9月21日)滙豐(5)股價跌穿30元大關,令好多長年手持滙豐股票、甚至視其為退休後收入來源嘅小股東好嬲之餘亦欲哭無淚,呢件事更被稱為「神話幻滅」。細數一下,除咗匯豐之外亦有一啲香港早期大型藍籌股經歷過幾十年嘅興衰,最終面對被踢出藍籌、股價暴瀉、私有化等下場,而今次要講嘅就係滙豐、電訊盈科、思捷環球同利豐。
· 滙豐 (5)
香港人對滙豐股票一直有情意結,歷年經歷過幾多高低起跌投資者依然不離不棄。
2007年滙豐股價創下歷史高位152.8元;2009年金融海嘯之後因為喺美國嘅投資嚴重虧損而要「世紀供股」(每12股供5股,供股價每股28元),股價暴跌至$33,後來有稍為回上;2016年英國脫歐公投滙豐股價再重挫至$44.5;今年4月接獲英倫銀行透過審慎監管局發出嘅書面通知,要求取消派發一年之中最大嘅第四季股息,今年亦不再派息,股價即刻大瀉近一成,跌穿40元心理關口$37.3,喺同年9月股價更甚跌穿30元大關。
· 電訊盈科 (8)
2000年李澤楷嘅盈科數碼動力以總代價2900億元「蛇吞象」收購香港電訊,組成電訊盈科,但由於電盈用巨額借貸作收購,利息成本極高,電盈於2001年虧損達69億元,一度資不抵債,另外因為美國科網股爆破,電盈股價繼而插水;2003年電盈因股價過低而落實合併股份計劃,每五股合併為一股,其股價由2000年高峰140元因而累計急插超過9成半,成為2002年同2003年表現最差藍籌股;2008年電盈終被剔出藍籌,直到而家股價只維持喺4元至5元。
· 思捷環球 (330)
曾幾何時思捷都係港股嘅「股王」之一。1993年思捷喺港交所上市,以3.7元招股,業務蒸蒸日上;2002年成為恒生指數成分股;2007年巔峰時期股價高見133元,市值達到1,715億元;2008年金融海嘯,思捷股價自此不斷下滑;2013年思捷被剔出藍籌股,業務持續走下坡;呢一年因為新冠疫情導致歐洲業務營業額大幅減退,其6間喺德國嘅子公司亦宣佈破產,如今思捷已淪為毫子股。
· 利豐
利豐喺8、90年代曾經風光一時。1973年利豐首次上市,獲得113倍超額認購;1987年股災後首次私有化;1992年集團重組業務後將旗下的出口貿易業務獨立上市;2000年利豐獲納入恒生指數成份股;2011年股價迎來歷史高位,市值一度達2088億元。不過受數碼化及電子商貿冒起等因素影響,利豐出口貿易業務轉而走下坡,2017年被剔出恒指成份股,股價暴跌超過98%最低至0.435元成為毫子股;最終今年3月以1.25元進行私有化,總作價72.22億元。
#N2NAFE #滙豐 #電訊盈科 #思捷環球 #利豐